Түркия Сирияга учкан орусиялык аскерий жана жарандык учактар үчүн аба мейкиндигин жапты. Бул тууралуу Түркиянын тышкы иштер министри Мевлүт Чавушоглу билдирди.

Маалыматка ылайык, Сирияда Орусиянын аскердик контингенти, анын ичинде согуштук учактар бар.

Чавушоглунун айтымында, бир айда учууга үч жолу уруксат берилген. Мөөнөтү аяктагандан кийин Түркия тарап аны узарткан эмес. Мунун себептери айтылган жок.

Анын айтымында, Босфор кысыгы аркылуу да аскердик кемелердин өтүүсүнө тыюу салынган. Ал эми Түркия чек араларынын жабышынын себеби Украинадагы согушка байланыштуу деп айтылат.

Мындан тышкары Чавушоглу Түркия Орусия менен Украинанын ортосундагы жаңжалда ортомчулук аракеттерин улантып жатканын белгиледи. Учурда жумушчу кичи топтор менен сүйлөшүүлөр жүрүп жатат.

Ошондой эле Украина менен Орусиянын президенттеринин Түркияда жолугушууга алдын ала макулдугу бардыгын кошумчалады.