Бишкектеги шаардык клиникалык Тез жардам ооруканасынын директорунун милдетин аткаруучу болуп Памир Муратов дайындалды. Саламаттыкты сактоо министри Алымкадыр Бейшеналиев жаңы кызматкерди оорукананын жамаатына тааныштырды.

Аталган министрликтин маалымат кызматынан кабарлашкандай, буга чейин Тез жардам ооруканасына директор болуп дайындалган Дамир Дүйшенов өз каалоосу менен жумуштан кетүү арызын жазды.

Белгилей кетсек, 4-февралда саламаттыкты сактоо министри Алымкадыр Бейшеналиев Травматология, ортопедия жана илим изилдөө борборун жоюп, директору Сабырбек Жумабековду кызматынан бошоткон. Анын ордуна шаардык клиникалык Тез жардам ооруканасы болуп кайра түзүлүп, ооруканага жаңы жетекчи дайындалган.

Андан соң министрдин орун басары аталган ооруканага барганда Сабырбек Жумабеков киргизе албай турганын айтып, Садыр Жапаровго кайрылуу жасап, президенттин гана чечимин күтөрүн айткан.