Экономикалык кылмыштарга каршы күрөшүү мамлекеттик кызматы айрым дарыканалардагы дары-дармектердин баасын негизсиз жогорулаткан фактыларды аныктады. Бул тууралуу аталган мекеменин маалымат кызматынан кабарлашты.
Ага ылайык, текшерүү учурунда коргоонуучу каражат, дарыларды бир нече эсеге кымбаттаткан фактылар табылган.
— Республика боюнча дарыканаларда баанын жогорулап кетпеши үчүн текшерүү иштери жүргүзүлүп жатат. Буга чейин ал аракеттер алдын алуу максатында уюштурулуп келген. Мыйзамсыз фактылар аныкталып, дарыкана ээлери катуу жазаланарын эске салабыз, — деп жазылган маалыматта.
Дары-дармектин кымбаттап кеткен фактыларына күбө болгондор Финансы полициясынын 1955 ишеним телефон номерине жана receivefinpol.gov.kg@gmail.com электрондук дарегине арыз менен кайрыла алышат.
Эскерте кетсек, дары-дармектин кымбаттап жатышы акыркы убакта курч маселеге айланууда.